Ирмос: Помощник и покровитель бысть мне во спасение, сей мой Бог и прославлю Его, Бог отца моего и вознесу Его, славно бо прославися. (Исх 15:1-2)
Стих: Даждь нам, Господи, Адамово покаяние и Твое святое смирение.

Вонми, небо, гласу кающегося; земле, внушай плач всех сыновей Адамовых, егоже ныне приносит Богу Силуан, Отец наш преподобне.

Отец всеродный Адам в раи ведяше сладость любве Божия. Сего ради, егда изгнан бысть из рая за грех и лишися любве Божия горце страдаше, и со стенанием велииим рыдаше на всю пустыню.

Сице всяка душа, познавшая Бога Духом Святым, но последи погубльшая благодать, мучится Адамовым мучением, и глаголет: "Скучает душа моя по Тебе, Господи, и слезно ищу Тебе. Воззри на скорбь мою и просвети тьму мою да возвеселится душа моя".

Пресвятая Владычице Богородице, зриши печаль мою: Бога оскорбих, и Он остави мя, но молю благость Твою: спаси мя, падшее создание Божие, спаси мя, раба Твоего.

Ирмос: Утверди, Господи, на камени заповедей Твоих подвигшееся сердце, яко един свят еси и Господь.
Стих: Даждь нам, Господи, Адамово покаяние и Твое святое смирение.

О Бозе и рае рыдаше Адам, взывая: "В раи радовахся аз и веселихся: Дух Божий веселяше мя. Ныне же мраз и глад мучат мя; зверие и птицы, иже бяху кротци и любляхе мя, одичаша и бежат от мене. Терзают мя вся скорби и болезни земли, и от множества скорби плачу аз: "Помилуй меня, Боже, падшее создание Твое".

И аз погубих благодать, и купно с Адамом зову: "Господи, како забуду Тебе? Твой тихий, кроткий взор привлече душу мою, и радовашеся дух мой в раи, идеже зрех Лице Твое. Како забуду рай, идеже любы Отца Небеснаго веселяше мя?"

Милостив буди мне, Господи, даруй мне духа смирения и любве - взываю Ти Адамовым гласом. О любы Господня, Кто позна тя, той неустанно ищет тя день и нощь, и вопиет: "Како не взыщу Тя, Господи, Ты прежде взыскал еси мя и дал еси насладитися Духом Твоим Святым, и душа моя Тебе возлюби."

Адамова дщи по роду, Дево Богородительнице, по благодати же Христу Богу родительница, мене изгнаннаго от Едема паки воззови.

Седален, глас 3. Подобен: красоте девства.

Красоту неизреченную Лица Христа Бога возлюбивый / И Того неописаннаго смирения присно жаждавий / в след пречистому Агнцу шел еси со слезами, блаженне / и сообразуяся смерти Господней / уразумел еси и сообщение страстей Его и силу воскресения / свидетельствующу Духу в души твоей спасение, / еже и да улучим предстательством твоим / Силуане, предодобне Отче наш.

Всемилостивая Владычице / молящуся рабу Твоему Силуану пред честным Твоим образом / подала еси туне молитву непрестанную / сице и нас, предстоящих Ти в скорби нашей не презри, / но вдохновением божественныя молитвы Твоея укрепи / присно взывати из глубины души / Господи Иисусе Христе, Богородицею помилуй нас и мир Твой.

Ирмос: Услыша пророк пришествие Твое, Господи, и убояся, яко хощеши от Девы родитися и человеком явитися и глаголаше: услышаш слух Твой, и убояхся. Слава силе Твоей, Господи.
Стих: Даждь нам, Господи, Адамово покаяние и Твое святое смирение.

Душею боляше Адам по изгнании из рая, и много слез пролияше он от скорби. Сице и всяка душа, познавшая Господа скучает по Нему и глаголет: "Где Господь мой? Почто не вижу Его в души моей? Что возбраняет ему жити во мне? яко несть во мне Христова смирения и любве к врагом."

Адам рыдаше и слезы его текоша на перси и на землю, и вся пустыня внемляша стонам его. Зверие и птицы умолчаша в печали, а Адам рыдаше ибо за грех его вси погубиша мир и любовь.

Мне не мила пустыня - плачет Адам - не мили мне высокия горы, ниже нивы, ни леса, ни пение птиц. Ничтоже мне не мило. Душа моя в великой печали: оскорбих бо Бога. И аще бы взял мя Господь паки в рай, и тамо имел бых тужити и плакати, понеже любимаго Бога оскорбих.

Отверзшая рая врата всем верным, святая Владычице, яже Адам заключи преступлением иногда, врата милости отверзи ми, кающемуся.

Ирмос: От нощи утренююща, Человеколбче, просвети, молюся, и настави на повеления Твоя, и научи мя, Спасе, творити волю Твою.

Стих: Даждь нам, Господи, Адамово покаяние и Твое святое смирение.

Вложи ми Господь дыхание жизни, и душа моя бысть сродная Богу, но аз благодать сию погубих и слезно ищу Духа Святаго. Плачите убо со мною вси зверие и птицы, плачите со мною лес и пустыня, плачите со мною все создание Божие, и утешите мя в горе и печали.

"Окаянный аз - рыдаше Адам - от мене произыдут и размножатся народи, и вси имут страждати и жити во вражде и убивати друг друга." И сия скорбь Адамова велика бе яко море, и уразумети ю могут токмо елицы познаша Господа, и коль много Он нас любит.

По земли хождаше Адам, и от многих болезней сердца своего плакашеся. Егда же изнемогаше тело его и ктому не можаше пролияти слезы, дух его и тогда горяше к Богу, ибо не можаше он забыти рай и красоту его, но паче множае душа Адамова любляше Бога, и влекошеся к Нему силою истыя любве.

Освященный храме и раю словесный, Благодатная, любы Твоя сильнейшая есть и пламеннейшая паче любве Херувимов и Серафимов, и о ней радуются небо и земля, темже уязвлена мя печалию греховною, исполни паки нетленныя радости райския.

Ирмос: Возопих всем сердцем моим к щедрому Богу, и услыша мя от ада преисподняго и возведе от тли живот мой.
Стих: Даждь нам, Господи, Адамово покаяние и Твое святое смирение.

Кто позна Бога Духом Святым ненасытно день и нощь стремится к Живому Богу, ибо любы Божия зело сладка. А не познавий Бога Духом Святым не может приити в созерцание и познати Иисуса Христа. Познается Он Духом Святым.

Адаме, Отче наш, виждь: аз, чадо твое, страдальчествую на земли. Воспой нам песнь Господню да услышит вся земля, и сынове твои возвысят ум свой к Богу и усладятся гласы небесныя песни, и забудут горе свое на земли.

Якоже рыдаше Адам о рае, и аз рыдаю, глаголя: "Где Ты, Свете мой, где Ты, радосте моя? Стопы Твоя благоухают во мне, но несть Тебе, и ничесоже ктому не веселит мя, зане оскорбих Бога и Он скрыся от мене."

Нетленно рождшая Агнца Божия, вземлющаго грехи мира, Владычице пренепорочная, возьми бремя от мене тяжкое греховное, и неизреченную радость воздаждь ми, отчаявшемуся.

КОНДАК, глас 6:

Новому Адаму Христу уподобивыйся, покаянием объял еси вся роды человеческия, но яко болезнию стяжав милующее сердце, Силуане блаженне Отче наш, утверди и мене присно звати тобою Господеви: Милостиве, помилуй мя, падшаго.

ИН КОНДАК, глас 4:

Образе Христов одушевленный, яко много любивый, паче множае страдал еси, и Гефсиманским плачем восприним небесное евангелие, сие богодухновенне благовестил людем земли, иже благодарно вопиют ти: Радуйся, великий Силуан, новейший богослове и учителю предивный.

Ирмос: Согрешихом, беззаконовахом, неправдовахом пред Тобою, ниже соблюдохом, ниже сотворихом якоже заповедал еси нам, но не предаждь нас до конца, отцев Боже.
Стих: Даждь нам, Господи, Адамово покаяние и Твое святое смирение.

Иисуса Христа зриши ныне, Адаме Отче наш, седящего во славе одесную Бога-Отца. Рци нам, коль милостив Он, и како любит создание свое. Скажи нам и о Пресвятей Богородице, и киими песньми ублажается Она на небесех. О Адаме, утеши и возрадуй нашя скорбныя души. Вскую молчиши? Се, вся земля скорбит...

Еда ты от любве Божиея не можеши и помянути нас? Еда ты зриши Богородицу во славе, и не можеши отвратитися от видения, и не хощеши нам, скорбящим, слово благое рещи, яко да забудем горе на земли. О Адаме, Отче наш, зриши скорбь сынов твоих. Вскую же молчиши?

Сынове мои - глаголет Адам, - не прикасайтеся мне. Не могу разлучитися любве Божия и глаголати с вами. Душа моя уязвлена есть любовию Господнею и веселится о красоте Его, и како возмогу помянути землю. Живущии пред Лицем Владыки не могут помышляти земная.

Испадшему мне божественныя славы даруй, Живоносный Источниче, струи слезныя, яко да умыю и аз помраченныя зеницы сердца и узрю паки, Милостивая, свет смиреннаго и кроткаго Лица Божия.

Ирмос: Егоже воинства небесныя славят и трепещут Херувими и Серафими всяко дыхание и тварь пойте, благословите и превозносите во вся веки.
Стих: Даждь нам, Господи, Адамово покаяние и Твое святое смирение.

Лице твое не отврати от нас, сироттвоих, Адаме Отче наш, яко скорбим. Рцы, что творим да угодим Богови. Призри на чад твоих, рассеянных по земли, рассеянных умом своим. Мнози забывают Бога, во тьме живут и идут в пропасти адовы.

Узрех Божию Матерь во славе - не дейте мене, чада моя - и како возмогу отвратитися и глаголати с вами. Вижу святыя пророки и апостолы, и вси подобятся Господу нашему Иисусу Христу. Хожу по райским садам, и всюду зрю славу Господню, ибо Господь во мне есть и сотвори мя подобна Себе.

Адаме Отче наш, ныне живый на небесех радуешися о славе Господней. Мы же, дети твои, страждем на земли. Скажи нам, како унаследуем рай, дабы и мы, подобно тебе, видели славу Господню. Душа наша скучает о Господе. Молим тя, утеши нас.

Надеждо ненадежных, молебное мое пение приими милостию Твоею, Всенепорочная, и прощение прегрешений даждь ми, Чистая, рыданьми вопиющему прилежно: Не презри, Благая, но воззови мя.

Ирмос: Безсеменнаго зачатия рождество несказанное Матери безмужныя нетленен плод Божие бо рождение обновляет естества: темже Тя вси роди яко Богоневестную Матерь православно величаем.

Стих: Даждь нам, Господи, Адамово покаяние и Твое святое смирение.

Адам глаголет: "Почто вопиете ко мне, дети моя. Господь любит вы и даде вам заповеди. Соблюдайте их, любите друг друга, и обрящете покой в Бозе. Кайтеся на всякий час в прегрешениях своих да возможете усрести Господа. Рече бо Господь: "Любящия Мя люблю и прославляющия мя прославлю."

Скучают души нашя, Адаме Отче наш, и скорби отяготиша нас. Рцы нам слово утешения. Воспой нам от песней, яже слышиши на небесех да услышит вся земля, и людие забудут горе свое: О Адаме, моли за нас, детей твоих, от многих скорбей печальна есть душа наша.

Ей, дети мои, не дейте мене яко прейде время моих скорбей. От красоты рая и сладости Духа Святаго, забых землю, и вся, яже на ней, ибо вижу славу Господню, и славу Святых, иже от Света Лица Божия и сами сияют, подобно Ему.

Райскую песнь пой нам, Адаме, да внемлет вся земля и усладится миром любве к Богу. Хощем слышати песни сия. Сладки бо суть, яко поются они Духом Святым.

Адама падшаго обнажение древле покрывшая рождеством Твоим, упование и покров мой, Чистая, и нетление паки облеци мя.

СВЕТИЛЕН, глас 8:

Адам погуби земский рай, и плачя искаше и: "Раю мой, раю, прекрасный мой раю." Но Господь любовию Своею на Кресте даде ему иный рай, лучше паче прежняго, на небесех, идеже свет Святыя Троицы. Что воздадим Господеви о любве Его к нам?

СЛАВА И НЫНЕ, БОГОРОДИЧЕН.

Светоносное селение Тя Божия воплощения воспеваем, Марие Богоблагодатная, темже мя люте омраченна страстьми просвети светом милости, миру Покрове всесветлый.